¹ ପେଣ୍ଟିକଷ୍ଟ ଦିବସ ଉପସ୍ଥିତ ହୁଅନ୍ତେ,ସମସ୍ତେ ଏକ ସ୍ଥାନରେ ସମବେତ ଥିଲେ |।

² ଆଉ ପ୍ରବଳବେଗରେ ବହୁଥିବା ପ୍ରଚଣ୍ଡ ପବନର ଶବ୍ଦ ତୁଲ୍ୟ ଗୋଟିଏ ଶବ୍ଦ ଅକସ୍ମାତ୍ ଆକାଶରୁ ଆସି,ଯେଉଁ ଗୃହରେ ସେମାନେ ବସିଥିଲେ,ସେହି ଗୃହର ସର୍ବତ୍ର ବ୍ୟାପିଗଲା,

³ ଆଉ ଅଗ୍ନି ସଦୃଶ ଜିହ୍ୱାା ଗୁଡ଼ିକ ସେମାନଙ୍କ ଦୃଷ୍ଟିଗୋଚର ହୋଇ ଗୋଟି ଗୋଟି କରି ସେମାନଙ୍କ ପ୍ରତ୍ୟେକ ଜଣଙ୍କ ଉପରେ ଅଧିଷ୍ଟିତ ହେଲା |।

⁴ ସେଥିରେ ସମସ୍ତେ ପବିତ୍ରଆତ୍ମାରେ ପରିପୂର୍ଣ୍ଣ ହେଲେ,ପୁଣି, ଆତ୍ମା ସେମାନଙ୍କୁ ଯେପରି କହିବାକୁ ଶକ୍ତି ଦେଲେ,ତଦନୁସାରେ ସେମାନେ ଅନ୍ୟାନ୍ୟ ଭାଷାରେ କଥା କହିବାକୁ ଲାଗିଲେ |।

⁵ ଏହି ସମୟରେ ଆକାଶର ନିମ୍ନସ୍ଥିତ ପ୍ରତ୍ୟେକ ଜାତିରୁ ଆଗତ ହୋଇ ଯିରୁଶାଲମରେ ବାସ କରୁଥିବା ଭକ୍ତ ଯିହୁଦୀମାନେ ସେ ପାଖରେ ଥିଲେ;

⁶ ଆଉ,ସେହି ଶବ୍ଦ ହୁଅନ୍ତେ,ବହୁ ଜନତା ଏକତ୍ର ହୋଇ ପ୍ରତ୍ୟେକ ଜଣ ଆପଣା ଆପଣା ଭାଷାରେ ସେମାନଙ୍କୁ କଥା କହୁଥିବା ଶୁଣିବାରୁ ହତ ବୁଦ୍ଧି ହେଲେ |।

⁷ ପୁଣି,ସେମାନେ ଆଚମ୍ବିତ ଓ ଚମତ୍କୃତ ହୋଇ କହିବାକୁ ଲାଗିଲେ,ଦେଖ,ଏହି ଯେଉଁ ଲୋକମାନେ କଥା କହୁଛନ୍ତି, ସେମାନେ ସମସ୍ତେ କଣ ଗାଲିଲୀୟ ନୁହନ୍ତି।

⁸ ତେବେ,ଆମ୍ଭେମାନେ କିପରି ପ୍ରତ୍ୟେକ ଜଣ ଆପଣା ଆପଣା ଜନ୍ମଭୁମିର ଭାଷାରେ କଥା ଶୁଣୁଅଛୁ।

⁹ ପାର୍ଥିୟ,ମାଦୀୟ ଓ ଏଲାମୀୟ,ପୁଣି ମେସପତାମିଆ,ଯିହୁଦା ଦେଶ ଓ କାପ୍ ପାଦକିୟା,ପନ୍ତ ଓ ଆସିଆ,

¹⁰ ଫ୍ରୃଗିଆ ଓ ଫ୍ରଫୁଲିଆ,ମିସର ଓ କୂରୀଣୀ ନିକଟବର୍ତ୍ତୀ ଲିବିଆ ଅଞ୍ଚଳନିବାସୀ ଏବଂ ରୋମରୁ ଆଗତ ଯିହୁଦୀ ଓ ଯିହୁଦୀ ଧର୍ମାମ୍ବଲମ୍ବୀ ପ୍ରବାସୀ,

¹¹ ପୁଣି,କ୍ରୀତିୟ ଓ ଆରବୀୟ ଲୋକ ଯେ ଆମ୍ଭେମାନେ,ଆମ୍ଭେମାନେ ଆପଣା ଆପଣା ଭାଷାରେ ଏମାନଙ୍କୁ ଇଶ୍ୱରଙ୍କ ମହତ୍ ମହତ୍ କର୍ମର କଥା କହିବା ଶୁଣୁଅଛୁ |।

¹² ଆଉ,ସମସ୍ତେ ଆଚମ୍ବିତ ଓ ହତବୁଦ୍ଧି ହୋଇ ପରସ୍ପର କହିବାକୁ ଲାଗିଲେ,ଏହାର ଅର୍ଥ କଅଣ।

¹³ କିନ୍ତୁ ଅନ୍ୟମାନେ ବିଦୃପ କରି କହିଲେ,ଏମାନେ ମିଷ୍ଟ ଦ୍ରାକ୍ଷାରସରେ ମତ୍ତ ହୋଇ ଅଛନ୍ତି |।

¹⁴ କିନ୍ତୁ ପିତର ଏକାଦଶଙ୍କ ସହିତ ଠିଆ ହୋଇ ଉଚସ୍ଵରରେ ସେମାନଙ୍କ ନିକଟରେ ବକ୍ତୃତା କରି କହିଲେ,ହେ ଯିହୁଦୀ ଲୋକେ,ଓ ଯିରୁଶାଲେମ ନିବାସୀ ସମସ୍ତେ,ଆପଣମାନେ ଏହା ଜ୍ଞାତ ହେଉନ୍ତୁ ଓ ମୋହର କଥାରେ କର୍ଣ୍ଣପାତ କରନ୍ତୁ |।

¹⁵ କାରଣ ଆପଣମାନେ ଯେପରି ମନେ କରୁଅଛନ୍ତି,ଏମାନେ ସେପରି ମାତାଲ୍ ନୁହନ୍ତି,ଯେଣୁ ବର୍ତ୍ତମାନ ସମୟ ସକାଳ ନଅ ଘଣ୍ଟା ମାତ୍ର।

¹⁶ କିନ୍ତୁ ଯୋୟେଲ ଭାବାବଦୀଙ୍କ ଦ୍ୱାରା ଯାହା ଉକ୍ତ ଅଛି,ଏ ସେହି ଘଟଣା:

¹⁷ ଈଶ୍ୱର କହନ୍ତି,ଶେଷକାଳରେ* ଏ ପରି ଘଟିବ ଯେ,ଅାମ୍ଭେ ସମସ୍ତ ମର୍ତ୍ତ୍ୟ ଉପରେ ଆପଣ ଆତ୍ମା ବୃଷ୍ଟି କରିବା, ସେଥିରେ ତୁମ୍ଭମାନଙ୍କ ପୁତ୍ରକନ୍ୟାମାନେ ଭାବବାଣୀ କହିବେ,ଆଉ ତୁମ୍ଭମାନଙ୍କର ଯୁବାମାନେ ଦର୍ଶନ ପାଇବେ,ପୁଣି ତୁମ୍ଭମାନଙ୍କର ପ୍ରାଚୀନମାନେ ସ୍ୱପ୍ନ ଦେଖିବେ।

¹⁸ ହଁ,ସେହି କାଳରେ ଅାମ୍ଭେ ନିଜ ଦାସଦାସୀମାନଙ୍କ ଉପରେ ଆପଣା ଆତ୍ମା ବୃଷ୍ଟି କରିବା,ସେଥିରେ ସେମାନେ ଭାବବାଣୀ କହିବେ*।

¹⁹ ଅାମ୍ଭେ ଉର୍ଦ୍ଧ୍ୱସ୍ଥ ଆକାଶରେ ନାନା ଅଦ୍ଭୂତ କର୍ମ;ପୁଣୀ ଅଧଃସ୍ଥ ପୃଥିବୀରେ ନାନା ଲକ୍ଷଣ,ରକ୍ତ,ଅଗ୍ନି ଓ ନିବିଡ଼ ଧୂମ ଦେଖାଇବା*।

²⁰ ପ୍ରଭୁଙ୍କର ମହତ୍ ଓ ପ୍ରସିଦ୍ଧ ଦିନର ଆଗମନ ପୂର୍ବରେ ସୂର୍ଯ୍ୟ ଅନ୍ଧକାରମୟ ଓ ଚନ୍ଦ୍ର ରକ୍ତମୟ ହୋଇଯିବ|*।

²¹ ଆଉ,ଏପରି ଘଟିବ ଯେ,ଯେକେହିଁ ପ୍ରଭୁଙ୍କ ନାମରେ ପ୍ରାର୍ଥନା କରିବ,ସେ ପରିତ୍ରାଣ ପାଇବ*|।

²² ହେ ଇସ୍ରାଏଲୀୟ ଲୋକମାନେ,ଏହି ସମସ୍ତ କଥା ଶୁଣନ୍ତୁ | ନାଜରିତିୟ ଯୀଶୁ ନାନା ଶକ୍ତିର କାର୍ଯ୍ୟ, ଅଦ୍ଭୁତ କର୍ମ ଓ ଲକ୍ଷଣ ଦ୍ୱାରା* ଆପଣମାନଙ୍କ ନିକଟରେ ଈଶ୍ୱରଙ୍କ ପ୍ରେରିତ ବ୍ୟକ୍ତି ବୋଲି ପ୍ରମାଣିତ ହୋଇଅଛନ୍ତି,ତାହାଙ୍କ ଦ୍ୱାରା ଈଶ୍ୱର ଯେ ଆପଣାମାନଙ୍କ ମଧ୍ୟରେ ଏହିସମସ୍ତ କର୍ମ କରିଅଛନ୍ତି,ଏହା ଅପଣମାନେ ନିଜେ ଜାଣନ୍ତି;

²³ ସେହି ବ୍ୟକ୍ତି ଈଶ୍ୱରଙ୍କ ନିରୂୂପୀତ ସଙ୍କଳ୍ପ ଓ ପୂର୍ବାଜ୍ଞାନୁସାରେ ସମର୍ପିତ ହୁଅନ୍ତେ*,ଆପଣମାନେ ତାହାଙ୍କୁ ଅଧାର୍ମିମାନଙ୍କ ହସ୍ତ ଦ୍ୱାରା କୃଶାରୋପଣ କରି ବଧ କରିଥିଲେ;

²⁴ କିନ୍ତୁ ଇଶ୍ୱର ମୃତ୍ୟୁର ବନ୍ଧନ ମୁକ୍ତ କରି ତାହାଙ୍କୁ ଉଠାଇଅଛନ୍ତି,କାରଣ ସେ ଯେ ମୃତ୍ୟୁ ଦ୍ୱାରା ଆବଦ୍ଧ ରହିବେ,ତାହା ଅସମ୍ଭବ |।

²⁵ ଦାଉଦ ତ ତାହାଙ୍କ ବିଷୟରେ କହନ୍ତି*,ମୁଁ ସର୍ବାଦା ମୋହର ସମୁଖରେ ପ୍ରଭୁଙ୍କୁ ଦର୍ଶନ କରୁଥିଲେ,କାରଣ ମୁଁ ଯେପରି ବିଚଳିତ ନ ହୁଏ,ସେଥିପାଇଁ ସେ ମୋହର ଦକ୍ଷିଣ ପାର୍ଶ୍ୱରେ ଅଛନ୍ତି|।

²⁶ ତେଣୁ ମୋହର ହୃଦୟ ପ୍ରଫୁଲ୍ଲ ଓ ମୋହର ଜିହ୍ୱା ଉଲ୍ଲସିତ ହେଲା,ଆହୁରି ମୋହର ଶରୀର ମଧ୍ୟ ଭରସାରେ ବସକରିବ,

²⁷ କାରଣ ତୁମ୍ଭେ ମୋହର ପ୍ରାଣକୁ ପତାଳରେ ପରିତ୍ୟାଗ କରିବ ନାହିଁ,କିଅବା ଆପଣା ଭକ୍ତକୂ କ୍ଷୟ ପାଇବାକୁ ଦେବ ନାହିଁ |।

²⁸ ତୁମ୍ଭେ ମୋତେ ଜୀବନର ପଥ ଜ୍ଞାତ କରାଇଅଚ୍ଛ,ତୁମ୍ଭେ ଆପଣା ଛାମୁରେ ମୋତେ ଆନନ୍ଦରେ ପୁର୍ଣ୍ଣ କରିବା |।

²⁹ ହେ ଭାଇମାନେ| ପିତୃକୁଳପତି ଦାଉଦଙ୍କ ବିଷୟରେ ମୁଁ ଆପଣମାନଙ୍କୁ ମୁକ୍ତ କଣ୍ଠ ରେ କହିପାରେ ଯେ,ସେ ମଲେ,ପୁଣି ସମାଧିପ୍ରାପ୍ତ ହେଲେ,ଆଉ ତାଙ୍କର ସମାଧି ଆଜି ପର୍ଯ୍ୟନ୍ତ ଆମ୍ଭମାନଙ୍କ ମଧ୍ୟରେ ଅଛି |।

³⁰ ତଥାପି ସେ ଭାବବାଦୀ ହେବାରୁ ଏବଂ ତାଙ୍କ ଔରସଜାତ ଜଣେ ବ୍ୟକ୍ତିଙ୍କି ଈଶ୍ୱର ଯେ ତାଙ୍କ ସିଂହାସନରେ ବସାଇବାକୁ ତାଙ୍କ ନିକଟରେ ଶପଥ କରି ପ୍ରତିଜ୍ଞା କରିଥିଲେ |।

³¹ ଏହା ଜାଣିବାରୁ ସେ ଭବିଷ୍ୟଦ୍ ଦର୍ଶନ ଦ୍ୱାରା ଖ୍ରୀଷ୍ଟଙ୍କର ପୁନରୁଥାନ ବିଷୟରେ କହିଥିଲେ,କାରଣ ସେ ପତାଳରେ ପରିତ୍ୟକ୍ତ ହେଲେ ନାହିଁ,କିଅବା ତାହାଙ୍କ ଶରୀର କ୍ଷୟ ପାଇଲା ନାହିଁ |।

³² ଏହି ଯୀଶୁଙ୍କୁ ଈଶ୍ୱର ଉଠାଇଅଛନ୍ତି,ସେ ବିଷୟରେ ଅମ୍ଭେମାନେ ସାକ୍ଷୀ |।

³³ ଅତଏବ,ଈଶ୍ୱରଙ୍କ ଦକ୍ଷିଣ ହସ୍ତ ଦ୍ୱାରା ଉନ୍ନତ ଓ ପିତାଙ୍କଠାରେ ପ୍ରତିଜ୍ଞାତ ପବିତ୍ରଆତ୍ମା ପ୍ରାପ୍ତ ହୋଇ,ଏହି ଯାହା ଆପଣମାନେ ଦେଖୁଛନ୍ତି ଓ ଶୁଣୁଅଛନ୍ତି,ତାହା ସେ ବୃଷ୍ଟି କରିଅଛନ୍ତି |।

³⁴ କାରଣ ଦାଉଦ ସ୍ୱର୍ଗାରୋହଣ କରି ନ ଥିଲେ,କିନ୍ତୁ ସେ ନିଜେ କହନ୍ତି,ପ୍ରଭୁ ମୋହର ପ୍ରଭୂଙ୍କୁ କହିଲେ, |।

³⁵ ଅମ୍ଭେ ଯେପର୍ଯ୍ୟନ୍ତ ତୁମ୍ଭର ଶତ୍ରୁମାନଙ୍କୁ ତୁମ୍ଭର ପାଦପୀଠ କରି ନାହୁଁ,ସେପର୍ଯ୍ୟନ୍ତ ଆମ୍ଭର ଦକ୍ଷଣରେ ବସିଥାଅ*|।

³⁶ ଅତଏବ,ସମସ୍ତ ଇସ୍ରାଏଲକୁଳ ନିଶ୍ଚୟ ଜାଣନ୍ତୁ ଯେ,ଯେଉଁ ଯୀଶୁ ଆପଣମାନେ କ୍ରୁଶରେ ବଧ କଲେ,ତାହାଙ୍କୁ ଈଶ୍ୱର,ପ୍ରଭୁ ଓ ଖ୍ରୀଷ୍ଟ ଉଭୟ ପଦରେ ନିଯୁକ୍ତ କରିଅଛନ୍ତି |।

³⁷ ଏହିକଥା ଶୁଣି ସେମାନଙ୍କର ହୃଦୟ ବିଦୀର୍ଣ୍ଣ ହୋଇ ଗଲା,ପୁଣି ସେମାନେ ପିତର ଓ ଅବଶିଷ୍ଟ ପ୍ରେରିତମାନଙ୍କୁ କହିଲେ,ଭାଇମାନେ,ଆମ୍ଭେମାନେ କଅଣ କରିବା।

³⁸ ତେଣୁ ପିତର ସେମାନଙ୍କୁ କହିଲେ,ଆପଣମାନେ ମନପରିବର୍ତ୍ତନ କରନ୍ତୁ,ଆଉ ନିଜ ନିଜ ପାପକ୍ଷମା ନିମନ୍ତେ ପ୍ରତ୍ୟେକ ଜଣ ଯୀଶୁ ଖ୍ରୀଷ୍ଟଙ୍କ ନାମରେ ବାପ୍ତିଜିତ ହେଉନ୍ତୁ;ତାହାହେଲେ ଆପଣମାନେ ପବିତ୍ରଆତ୍ମାଙ୍କର ଦାନ ପ୍ରାପ୍ତ ହେବେ |।

³⁹ କାରଣ ଏହି ପ୍ରତିଜ୍ଞା ଆପଣମାନଙ୍କ ନିମନ୍ତେ,ଆପଣମାନଙ୍କର ସନ୍ତାନସନ୍ତତିମାନଙ୍କ ନିମନ୍ତେ,ପୁଣି ଦୁରବର୍ତ୍ତୀ ଯେତେ ଲୋକଙ୍କୁ ପ୍ରଭୁ ଆମ୍ଭମାନଙ୍କ ଈଶ୍ୱର ଆପଣା ନିକଟକୁ ଡାକିବେ,ସେହିସମସ୍ତଙ୍କ ନିମନ୍ତେ |।

⁴⁰ ପୁଣି,ଅନ୍ୟାନ୍ୟ ଅନେକ କଥା ଦ୍ୱାରା ସେ ସାକ୍ଷ୍ୟ ଦେବାକୁ ଲାଗିଲେ ଓ ସେମାନଙ୍କୁ ଉପଦେଶ ଦେଇ କହିଲେ,ଏହି କୁଟିଳ ବଂଶଠାରୁ ଆପଣ ମାନେ ରକ୍ଷାପ୍ରାପ୍ତ ହେଉନ୍ତୁ|।

⁴¹ ସେଥିରେ ଯେଉଁମାନେ ତାହାଙ୍କ ବାକ୍ୟ ଗ୍ରହଣ କଲେ,ସେମାନେ ବାପ୍ତିଜିତ ହେଲେ,ଆଉ ସେହି ଦିନ ପ୍ରାୟ ତିନି ସହସ୍ର ଲୋକ ମଣ୍ଡଳୀ ସହିତ ସଂଯୁକ୍ତ ହେଲେ |।

⁴² ସେମାନେ ପ୍ରେରିତମାନଙ୍କର ଶିକ୍ଷାରେ,ସହଭାଗିତାରେ,ରୋଟୀ ଭାଙ୍ଗିବାରେ ଓ ପ୍ରାର୍ଥନା କରିବାରେ ନିବିଷ୍ଟ ଚିତ୍ତ ହୋଇ ରହିଲେ |।

⁴³ ଆଉ,ଲୋକସମସ୍ତେ ଭିତ ହେବାକୁ ଲାଗିଲେ;ପ୍ରେରିତ ମାନଙ୍କ ଦ୍ୱାରା ମଧ୍ୟ ଅନେକ ଅନେକ ଅଦ୍ଭୁତ କର୍ମ ଓ ଲକ୍ଷଣ ସାଧିତ ହେବାକୁ ଲାଗିଲା |।

⁴⁴ ମାତ୍ର ଯେଉଁମାନେ ବିଶ୍ୱାସ କଲେ,ସେମାନେ ସମସ୍ତେ ଏକତ୍ର ରହି ସବୁ ପଦାର୍ଥ ସାଧାରଣ ସମ୍ପତ୍ତି ବୋଲି ଜ୍ଞାନ କରୁଥିଲେ |।

⁴⁵ ପୁଣି ସେମାନେ ଆପଣା ଆପଣା ସ୍ଥାବର ଅସ୍ଥାବର ସମ୍ପତ୍ତି ବିକ୍ରୟ କରି,ଯାହାର ଯେପରି ପ୍ରୟୋଜନ ସେହି ଅନୁସାରେ ସମସ୍ତଙ୍କୁ ବାଣ୍ଟିଦେବାକୁ ଲାଗିଲେ |।

⁴⁶ ଆଉ,ସେମାନେ ଏକଚିତ୍ତ ହୋଇ ପ୍ରତିଦିନ ମନ୍ଦିରରେ ସମବେତ ହୋଇ ରହୁଥିଲେ ଓ ଘରେ ଘରେ ରୋଟୀ ଭାଙ୍ଗିଲେ ଆନନ୍ଦରେ ଓ ସରଳ ହୃଦୟରେ ଭୋଜନପାନ କରି ଈଶ୍ୱରଙ୍କ ପ୍ରଶଂସା କରୁଥିଲେ |।

⁴⁷ ଏବଂ ସମସ୍ତ ଲୋକଙ୍କର ପ୍ରିୟପାତ୍ର ହେଉଥିଲେ ପୁଣି,ପ୍ରଭୁ ପରିତ୍ରାଣ ପ୍ରାପ୍ତ ହେଉଥିବା ଲୋକଙ୍କୁ ପ୍ରତିଦିନ ମଣ୍ଡଳୀ ସହିତ ସଂଯୁକ୍ତ କରିବାକୁ ଲାଗିଲେ |।