² પણ વ્યભિચારના કારણથી પ્રત્યેક પુરૂષે પોતાની વહુ રાખવી, ને પ્રત્યેક બાયડીએ પોતાનો વાર રાખવો.

³ વરે વહુને જે યોગ્ય તે આપવું, ને એમજ વહુએ વરને પણ.

⁴ વહુને પોતાના શરીરનો અધિકાર નથી, પણ વરને છે;

⁵ એક બીજાથી જૂદાં ના થાઓ, પણ પ્રાર્થનાને સારૂ અવકાશ મળે કેવળ એ કારણ માટે થોડી વાર સુધી એક બીજાની સમ્મતિથી જુદાં રહેવાય. અને પછી એકઠાં થાઓ, રખે શેતાન તમારા અદમનને લીધે તમારી પરીક્ષા કરે.

⁶ આજ્ઞા દાખલ નહિ પણ રજા દાખલ એ હું કહું છું.

⁷ કેમકે મારી ઇચ્છા છે કે, સઘળાં માણસ મારા જેવાં હોય. પણ દેવથી પ્રત્યેકને પોતપોતાનું કૃપાદાન છે, એકને આમ, ને બીજાને તેમ.

⁸ પણ અણપરણેલાઓને તથા વિધવાઓને હું કહું છું કે, મારા જેવા રહે તો તેઓને ગુણકારી થાય.

⁹ પણ પોતાને કબજે રાખી ન શકે તો પરણે, કેમકે બળવા કરતાં પરણવું સારૂ છે.

¹⁰ પણ પરણેલાઓને હું આજ્ઞા કરૂં છું, હું તો નહિ, પ્રભુ કરે છે, કે વહુએ પોતાના વરથી જુદા થવું નહિ;

¹¹ (પણ જો જુદી થાય તો પરણ્યા વિના રહેવું, અથવા વરની સાથે મેળાપ કરવો); ને વરે વહુને છોડવી નહિ.

¹² અને બાકી રહેલાઓને પ્રભુ તો નહિ, પણ હું કહું છું કે, જો કોઇ ભાઇને અવિશ્વાસી વહુ હોય, ને એ તેની સાથે રહેવાને રાજી હોય, તો તેણે એને છોડવી નહિ;

¹³ ને કોઇ વહુને અવિશ્વાસી વર હોય,ને એ તેની સાથે રહેવાને રાજી હોય, તો તેણીએ એને છોડવો નહિ.

¹⁴ કેમકે અવિશ્વાસી વર વહુથી પવિત્ર કરાએલો છે, ને અવિશ્વાસી વહુ વરથી પવિત્ર કરાએલી છે; નહિ તો તમારા બાળક અશુદ્ધ હોત, પણ હવે તેઓ પવિત્ર છે.

¹⁵ પણ જો અવિશ્વાસી માણસ જુદું થાય, તો જુદું થવા ડો; એવા પ્રસંગમાં ભાઇ કે બહેન બંધનમાં નથી; પણ દેવે આપણે શાંતિમાં તેડ્યા છે.

¹⁶ કેમકે, અરે વહુ, તું વરને તારીશ કે નહિ એ વિષે તું શું જાણે છે? અથવા, અરે વર, તું વહુને તારીશ કે નહિ એ વિષે તું શું જાણે છે?

¹⁷ કેવળ જેમ દેવે પ્રત્યેકને વહેંચી આપ્યું છે, જેમ પ્રભુએ પ્રત્યેકને તેડ્યું છે, તેમ તેણે ચાલવું; ને એમજ હું સર્વ મંડળીઓમાં ઠરાવું છું.

¹⁸ શું કોઇ સુનતી તેડાએલો છે? તો બેસુનતી ન થવું, શું કોઇ બેસુનતીમાં તેડાએલો છે? તો સુનતી થવું નહિ.

¹⁹ સુનત તો કંઈ નથી, ને બેસુનત કંઇ નથી, પણ દેવની અજ્ઞાનું પાલન તેજ [બધું છે].

²⁰ પ્રત્યેક જે સ્થિતિમાં તેડાયો છે તેમાંજ તે રહે.

²¹ શું તું દાસ છતાં તેડાયો છે?તો એની ચિંતા ન કર; પણ જો મોકળા થવાને વગ મળે, તો તે કરી લે.

²² કેમકે પ્રભુથી તેડાએલો દાસ તે પ્રભુનો મોકળો કરાએલો; ને એમજ જે મોકળો છતાં તેડાએલો તે ખ્રીસ્તનો દાસ છે.

²³ તમે મૂલ્યથી ખરીદાએલા હતા; માણસના દાસો ન થાઓ.

²⁴ ભાઈઓ, જેમાં પ્રત્યેક તેડાયો તેમાં દેવની સાથે તેણે રહેવું.

²⁵ હવે કુંવારીઓ વિષે મને પ્રભુથી આજ્ઞા નથી; પણ જેમ વિશ્વાસુ થવાને પ્રભુ પાસેથી હું કૃપા પામ્યો, તેમ મત આપું છું.

²⁶ તો મને એ ગુણકારી દીસે છે,એટલે હાલના સંકટમાં માણસને એમનેએમ રહેવું ગુણકારી છે.

²⁷ શું વહુને તું બંધાએલો છે? તો છુટકાની ઇચ્છા ન કર. શું વહુથી છુટેલો છે? તો વહુની ઈચ્છા ન કર.

²⁸ પણ જો તું પરણે, તો તું પાપ નથી કરતો; ને જો કુંવારી પરણે તો તે પાપ નથી કરતી; પણ એવાંઓને દેહમાં વિપત્તિ થશે; પણ હું તમારા પર દયા રાખું છું.

²⁹ પણ ભાઈઓ, હું એ કહું છું કે કાળ થોડો છે; માટે હવેથી જેઓ પરણેલા તેઓ વગર પરણેલા જેવો થાય;

³⁰ ને રડનારા ન રડનારા જેવા; ને હરખનારા ન હરખનારા જેવા; ને વેચાતું લેનારા ન રાખનારા જેવા થાય;

³¹ ને આ જગતના વહેવાર કરનારા એનો કુવહેવાર કરનારા જેવા ન થાય. કેમકે આ જગતનું ડોળ વિતી જાય છે.

³² પણ તમે નિશ્ચિંત થાઓ, એવી મારી ઈચ્છા છે. જે પરણેલો નથી તે પ્રભુની વાતોની ચિંતા રાખે છે, કે પ્રભુને કેમ પ્રસન્ન કરવો;

³³ પણ પરણેલો જગતની વાતોની ચિંતા રાખે છે, કે વહુને કેમ પ્રસન્ન કરવી.

³⁴ વહુ તથા કુંવારીમાં પણ ફેર છે. જે પરણેલી નથી તે પ્રભુની વાતોની ચિંતા રાખે છે, કે તે શરીરમાં તથા આત્મામાં પવિત્ર થાય; પણ પરણેલી તે જગતની વાતોની ચિંતા રાખે છે, કે વરને કેમ પ્રસન્ન કરવો.

³⁵ પણ તમારા પોતાના હિતને સારૂ હું તે કહું છું; તમને ફાંદામાં નાખવાને માટે નહિ, પણ એ સારૂ કે યોગ્ય રીતે [તમે ચાલો] તથા એક મનથી વગર અકળામણે તમે પ્રભુની સેવા કરો.

³⁶ પણ જો કોઇ વિચારે, કે પોતે પોતાની કુંવારી [દીકરી] વિષે અયોગ્ય કરે છે, ને તે પુખ્ત ઉમરની થઇ હોય, ને અગત્ય એવી હોય, તો તે જે ઈચ્છે એવી કરે, તે પાપ કરતો નથી; એઓ પરણે.

³⁷ પણ અગત્ય ન છતાં, જે પોતાના હૃદયમાં સ્થિર રહે છે, ને પોતાની ઈચ્છા પર અધિકાર રાખે છે, ને પોતાના હૃદયમાં એમ ઠરાવ્યું છે, કે હું પોતાની કુંવારી એવીજ રાખીશ, તે સારૂ કરે છે.

³⁸ ત્યરે જે તેણે પરણાવે છે તે સારૂ કરે છે, ને જે તેને પરણાવતો નથી તે વધારે સારૂ કરે છે.

³⁹ વહુ જ્યાં સુધી તેનો વર જીવે છે,ત્યાં સુધી નિયમથી બંધાએલી છે; પણ જો તેનો વર મરી ગયો હોય, તો જેને તે ઇચ્છે, તેને પરણવાને તે છૂટી છે, પણ કેવળ પ્રભુના લોકમાં.

⁴⁰ પણ જો તે એકલી રહે, તો મારા ધાર્યા પ્રમાણે, તે વધતી કુશળ રહેશે; ને મને પણ દેવનો આત્મા છે, એમ હું ધારૂં છે.