² અને તેણે ત્રેવીસ વર્ષ ઇસ્રાએલનો ન્યાય કીધો; પછી તે મરણ પામ્યો, ને શામીરમાં દટાયો.

³ અને તે પછી ગિલઆદી યાઇર ઉઠ્યો; ને તેણે બાવીસ વર્ષ ઇસ્રાએલનો ન્યાય કીધો.

⁴ અને તેને ત્રીસ દીકરા હતા, તેઓ ત્રીસ ગધેડાના વછેરા પર સવારી કરતા હતા, ને તેમને ત્રીસ નગર હતાં, કે જે આજ સુધી હાવ્વોથ-યાઇર કહેવાય છે, અને ગિલઆદ દેશમાં છે.

⁵ અને યાઇર મરણ પામ્યો, ને કામોનમાં દટાયો.

⁶ અને ઇસ્રાએલપુત્રોએ ફરી યહોવાહની દૃષ્ટિમાં ભુંડું કીધું, ને બઆલીમ તથા આશ્તારોથ, તથા અરામના તથા સીદોનના તથા મોઆબના તથા આમ્મોનપુત્રોના તથા પલિસ્તીઓના દેવોની તેઓએ સેવા કરી; ને યહોવાહનો ત્યાગ કરીને તેઓએ તેની સેવા ન કરી.

⁷ ને યહોવાહનો કોપ ઇસ્રાએલ પર સળગ્યો, ને તેણે તેઓને પલિસ્તીઓના તથા આમ્મોનપુત્રોના હાથમાં વેચ્યા.

⁸ અને તેઓએ તે વર્ષ ઇસ્રાએલપુત્રોને હેરાન કીધા તથા તેઓ પર જુલમ કીધો; યરદનને પેલે પાર અમોરીઓનો જે દેશ ગિલઆદમાં છે, ત્યાંના સર્વ ઇસ્રાએલપુત્રો પર અરાઢ વર્ષ [તેઓએ જુલમ કીધો].

⁹ અને યહુદાહની તથા બિન્યામીનની તથા એફ્રાઈમના કુળની સામે પણ લડવા સારૂ, આમ્મોનપુત્રો યરદન ઉતર્યા; તેથી ઇસ્રાએલ બહુ દુઃખી થયા.

¹⁰ અને ઇસ્રાએલપુત્રોએ યહોવાહની આગળ પોકાર કરીને કહ્યું,અમે પોતાના દેવને તજીને બઆલીમની સેવા કર્યાથી તારી વિરુદ્ધ પાપ કર્યું છે.

¹¹ અને યહોવાહે ઇસ્રાએલપુત્રોને કહ્યું, મિસરીઓથી તથા અમોરીઓથી તથા આમ્મોનપુત્રોથી તથા પલિસ્તીઓથી, શું તમને [મેં ઉગાર્યો નહોતા]?

¹² વળી સીદોનીઓએ તથા અમાલેકીઓએ તથા માઓનીઓએ તમારા પર જુલમ કીધો; ને તમે મારી આગળ પોકાર કીધો, ને મેં તમને તેઓના હાથમાંથી ઉગાર્યો.

¹³ તો પણ તમે મારો ત્યાગ કીધો છે, ને બીજા દેવોની સેવા કીધી છે; એ માટે હું તમને હવે પછી નહિ ઉગારીશ.

¹⁴ તમે જે દેવોને પસંદ કર્યા છે તેઓની પાસે જઈને પોકાર કરો; તેઓ ભલે તમારા દુઃખની વેળાએ તમને બચાવે.

¹⁵ અને ઇસ્રાએલપુત્રોએ યહોવાહને કહ્યું, અમે પાપ કર્યું છે; તને જે સારૂ લાગે તે તું અમને કર; પણ કૃપા કરીને આજેજ અમને છોડાવ.

¹⁶ અને તેઓએ પોતા મધ્યેથી પારકા દેવોને દૂર કરીને યહોવાહની સેવા કરી; ને ઇસ્રાએલના દુઃખને લીધે તેનો આત્મા ઉદાસ થયો.

¹⁷ અને આમ્મોનપુત્રોએ એકઠા થઈને ગિલઆદમાં છાવણી કરી. અને ઇસ્રાએલપુત્રોએ એકઠા થઈને મિસ્પાહમાં છાવણી કરી.

¹⁸ અને ગિલઆદના લોકોએ, એટલે સરદારોએ, એક બીજાને કહ્યું, આમ્મોનપુત્રોની સામે યુદ્ધ કોણ શરૂ કરશે? તે માણસ ગિલઆદમાં રહેનારા સર્વનો ઉપરી થશે.