¹ આરંભથી જે નજરે જોનારા તથા વચનના સેવકો હતા, તેમના આપણને કહી દીધેલા પ્રમાણે,

² આપણામાં પુરી થએલી વાતોનું વર્ણન કરવાને ઘણાએ હાથમાં લીધું છે;

³ એ માટે, ઓ નેકનામદાર થેઓફિલ, મેં પણ શરૂઆતથી સઘળી વાતોની શોધ ચોકસાઈથી કરીને, તને વિગતવાર લખવાને ઠરાવ્યું,

⁴ કે જે વાતો તને શીખવવામાં આવી છે, તેઓની નિશ્ચયતા તું જાણે.

⁵ યહુદાહના રાજા હેરોદના દિવસોમાં ઝખાર્યાહ નામે અબિયાહના વર્ગમાનો એક યાજક હતો; ને તેની વહુ હારૂનની દીકરીઓમાંની હતી, ને તેનું નામ એલીસબેત હતું.

⁶ અને તે બેહુ દેવની આગળ ન્યાયી હતાં, ને પ્રભુની સઘળી આજ્ઞા તથા વિધિઓ પ્રમાણે નિર્દોષ રીતે ચાલતા હતાં.

⁷ અને તેઓને સંતાન નહોતું, કારણ કે એલીસાબેત વાંઝણી હતી, ને તેઓ બેહુ ઘણાં ઘરડાં હતાં.

⁸ અને એમ થયું કે તે પોતાના વર્ગના વારા પ્રમાણે યાજકનું કામ દેવની આગળ કરતો હતો,

⁹ એટલામાં યાજકપદના રિવાજ પ્રમાણે પ્રભુના મંદિરમાં જઈને ધૂપ ચઢાવવાનો તેનો વારો આવ્યો.

¹⁰ અને લોકની આખી સભા ધૂપ કરતી વેળા બહાર પ્રાર્થના કરતી હતી.

¹¹ તેટલામાં ધૂપવેદીની જમણી બાજુએ પ્રભુનો એક દૂત ઉભેલો તેને દેખાયો.

¹² અને તેને જોઇને ઝખાર્યાહ ગભરાયો, ને તેને બીક લાગી.

¹³ પણ દૂતે તેને કહ્યું કે, ઝખાર્યાહ, બી માં; કેમકે તારી વિનંતી સાંભળવામાં આવી છે, ને તારી વહુ એલીસાબેત દીકરો જણશે, ને તેનું નામ તું યોહાન પાડીશ.

¹⁴ અને તને હર્ષ તથા આનંદ થશે, ને ઘણાં તેના જન્મના લિખે હરખાશે;

¹⁵ કેમકે તે પ્રભુ આગળ મોટો થશે, ને દ્રાક્ષરસ કે દારૂ તે પીશે નહિ; તે પોતાના માના પેટથી પવિત્ર આત્માએ ભરપૂર થશે.

¹⁶ અને તે ઇસ્રાએલના વંશમાંના ઘણાને તેઓના દેવ પ્રભુ તરફ ફેરવશે.

¹⁷ અને તે એલીયાહના આત્માએ તથા પરાક્રમે તેની આગળ ચાલશે, એ માટે કે તે બાપોનાં મન છોકરા તરફ તથા ન માનનારાઓને ન્યાયીઓના જ્ઞાનમાં [ચાલવાને] ફેરવે; તથા પ્રભુને સારું સિદ્ધ થએલી કોમ તૈયાર કરે.

¹⁸ અને ઝખાર્યાહે દૂતને કહ્યું કે, એ મને શાથી જણાય? કેમકે હું ઘરડો છું, ને મારી વહુ ઘણાં વરસની થઇ છે.

¹⁹ અને દૂતે તેને ઉત્તર આપતા કહ્યું કે, દવની આગળ ઉભો રહનાર ગબ્રીએલ હું છું, ને તારી સાથે બોલવા તથા તને આ સુવાર્તા કહેવા સારું હું મોકલાયો છું;

²⁰ ને જો, એ વાત બનશે તે દિવસ લગી તું મૂંગો રહેશે ને બોલી શકશે નહિ, કેમકે મારી વાતો જે પોતાને સમયે પુરી થશે તેઓનો વિશ્વાસ તે કીધો નહિ.

²¹ અને લોક ઝખાર્યાહની વાટ જોહતા હતા, ને તેને મંદિરમાં વાર લાગી, માટે અચંબો પામ્યા.

²² અને તે બહાર આવ્યો ત્યારે તેઓની જોડે તે બોલી શક્યો નહિ; ને મંદિરમાં તેને કંઈ દર્શન થયું હશે એવું તેઓ સમજ્યા; ને તે તેઓને ઈસરો કરતો હતો, ને મુંગો રહ્યો.

²³ અને તેના સેવા કરવાના દિવસો પુરા થયા ત્યારે એમ થયું કે તે પોતાના ઘેર ગયો.

²⁴ અને તે દહાડો પછી તેની વહુ એલીસાબેતને ગર્ભ રહ્યો, ને પાંચ મહિના સુધી તે સંતાઈ રહી, ને કહ્યું કે,

²⁵ માણસોમાંથી મારું મેણું ટાળવા સારૂ મારા પર પોતાના દ્રષ્ટિ કરવાના દિવસોમાં પ્રભુએ મને આવું કીધું છે.

²⁶ અને છઠ્ઠે મહિને ગાબ્રીએલ દૂત નાઝારેથ નામે ગાલીલના શહેરમાં એક કુમારિકાની પાસે દેવ તરફથી મોકલાયો હતો.

²⁷ દાઉદના વંશના, યુસફ નામે, એક પુરુષ જોડે તેની સગાઇ થઇ હતી; ને તે કુમારિકાનું નામ મરિયમ હતું.

²⁸ અને દૂતે તેની પાસે આવીને કહ્યું કે, હે કૃપા પામેલી, સુખી રહે, પ્રભુ તારી સાથે છે.

²⁹ પણ એ વચન સાંભળીને તે ઘણી ગભરાઈ, ને વિચાર કરવા લાગી કે, આ કઈ જાતની સલામ હશે!

³⁰ અને દૂતે તેને કહ્યું કે, ઓ મરિયમ, બી માં, કેમકે દેવથી તું કૃપા પામી છે.

³¹ અને જો, તને ગર્ભ રહેશે ને તું દીકરો જણશે, ને તું તેનું નામ ઇસુ પાડશે.

³² તે મોટો થશે, ને પરાત્પરનો દીકરો કહેવાશે; ને દેવ પ્રભુ તને તેના પિતા દાઉદનું રાજ્યાસન આપશે.

³³ અને તે યાકુબના ઘર પર સર્વકાળ રાજ્ય કરશે, ને તેના રાજ્યનો અંત આવશે નહિ.

³⁴ અને મરિયમે દૂતને કહ્યું કે, એ કેમ કરીને થશે? કેમકે મેં કોઈ પુરુષને જણ્યો નથી.

³⁵ અને દૂતે તેને ઉત્તર આપતા કહ્યું કે, પવિત્ર આત્મા તારા પર આવશે, ને પરાત્પરનું પરાક્રમ તારા પર આચ્છાદન કરશે; માટે જે [તારાથી જન્મશે તે પવિત્ર દેવનો દીકરો કહેવાશે.

³⁶ અને જો તારી સગી એલીસાબેતે પણ તેના ઘડપણમાં દીકરાનો ગર્ભ ધર્યો છે; અને જે વાંઝણી કહેવાતી હતી, તેને આ છઠ્ઠો મહિનો જાય છે.

³⁷ કેમકે દેવ પાસેથી [આવેલું] કોઈ પણ વચન પરાક્રમ વગરનું નહિ થશે.

³⁸ અને મરિયમ કહ્યું કે, જો, હું પ્રભુની દાસી, તારા કહ્યા પ્રમાણે મને થાઓ. ત્યારે દૂત તેની પાસેથી ગયો.

³⁹ અને તે દિવસોમાં મરિયમ ઉઠીને પહાડી દેશમાં યહુદાહના એક શહેરમાં ઉતાવળથી ગઇ.

⁴⁰ અને ઝખાર્યાહને ઘેરે જઈને એલીસાબેતને સલામ કહી.

⁴¹ અને એમ થયું કે એલીસાબેતે મરિયમની સલામ સાંભળી, ત્યારે બાળક તેના પેટમાં કૂદ્યું, ને એલીસાબેત પવિત્ર આત્માથી ભરપુર થઇ;

⁴² ને મોટો ઘાટો પાડીને કહ્યું કે, બાયડીઓમાં તને ધન્ય છે, ને તારા પેથના ફળને ધન્ય છે.

⁴³ અને એ [કુપા] મને ક્યાંથી, કે મારા પ્રભુની માં મારી પાસે આવે?

⁴⁴ કેમકે, જો, તારી સલામનો અવાજ મારે કાને પડતાં બાળક મારા પેટમાં હરખે કૂદ્યું.

⁴⁵ અને જેણે વિશ્વાસ કીધો તેણીને ધન્ય છે, કેમકે તેને પ્રભુ તરફથી જે વાતો કહેવામાં આવી છે તેઓ પુરી થશે.

⁴⁶ અને મરિયમે કહ્યું કે, મારો જીવ પ્રભુને મોટો માને છે,

⁴⁷ અને દેવ મારા તારનારમાં મારો આત્મા હરખાયો છે,

⁴⁸ કારણ કે તેણે પોતાની દાસીની દીનાવસ્થા પર દ્રષ્ટિ કીધી છે; કેમકે, જો, હવેથી સઘળી પેઢીઓ મને ધન્ય કહેશે.

⁴⁹ કેમકે પરાક્રમીએ મારે સારું મોટાં કામ કીધાં છે, ને તેનું નામ પવિત્ર છે.

⁵⁰ અને જેઓ તેનું ભય રાખે છે, તેઓ પર પેઢી દર પેઢી તેની દયા રહે છે.

⁵¹ તેણે પોતાને ભુજ બળ દેખાડ્યું છે, ને ગર્વિષ્ઠોને તેઓની હૃદય ની કલ્પનામાં વેરી નાખ્યા છે.

⁵² તેને સરદારોને રાજ્યાસન પરથી ઉતારી નાખ્યા છે, ને દીન જનોને તેણે ઉંચો કીધા છે.

⁵³ તેણે ભુખ્યાંઓને સારાં વાનાંથી તૃપ્ત કીધા છે, ને શ્રીમંતોને ખાલી હાથે પાછા કાઢ્યા છે.

⁵⁴ આપણા બાપદાદાઓને, તેના કહ્યા પ્રમાણે, ઈબ્રાહીમ પર તથા તેના વંશ પર

⁵⁵ સદા દયા કરવાનું સંભારીને, તેણે પોતાના સેવક ઇસ્રાએલને સહાય કીધી,

⁵⁶ અને મરિયમ આસરે ત્રણ મહિના સુધી તેની સાથે રહી, ને પાછા પોતાને ઘેર પાછી ગઈ.

⁵⁷ હવે એલીસાબેતના જણવાના દહાડા પૂરા થયા, એટલે તેની દીકરો જણી.

⁵⁸ અને તેના પડોસીઓએ તથા સગાંઓએ સાંભળ્યું કે પ્રભુએ તેના પર મોટી દયા કીધી છે, ને તેઓ તેણીની સાથે હર્ષ પામ્યા.

⁵⁹ અને એમ થયું કે આઠમે દિવસે તેઓ છોકરાની સુનંત કરવા આવ્યા, ને તેઓ તેના બાપના નામ ઉપરથી તેનું નામ ઝખાર્યાહ પાડત;

⁶⁰ અને તેની માએ ઉત્તર આપતાં કહ્યુ કે, એમ નહિ, પણ તેનું નામ યોહાન પાડવું.

⁶¹ અને તેઓએ તેને કહ્યું કે, તારા સગામાંના કોઈનું એવું નામ પાડેલું નથી.

⁶² અને તેઓએ ઈસારો કરીને તેના બાપને પુછ્યું કે, તું તેનું શું નામ પાડવા ચાહે છે?

⁶³ ને તેણે પાટી માગી, ને એમ લખ્યું કે, તેનું નામ યોહાન છે.

⁶⁴ અને તેઓ સર્વ અચંબો પામ્યા. અને તરત તેનું મ્હોડું ઉધડી ગયું, ને તેની જીભ [છુટી થઇ], ને તે દેવની સ્તુતિ કરતો બોલવા લાગ્યો.

⁶⁵ અને તેઓની આસપાસના સર્વ રહેવાસીઓને બીક લાગી, ને યહુદાહના આખા પહાડી દેશમાં એ સઘળી વાતોની ચર્ચા ચાલી.

⁶⁶ અને જેઓએ તે વાતો સાંભળી તેઓ સઘળાએ તે પોતાના મનમાં રાખીને કહ્યું કે, ત્યારે આ છોકરો કેવો થશે! કેમકે પ્રભુનો હાથ તેના પર હતો.

⁶⁷ અને તેનો બાપ ઝખાર્યાહ પ્રવિત્ર આત્માએ ભરપુર થયો; ને તેણે એવું ભવિષ્ય કહ્યું કે,

⁶⁸ ઇસ્રાએલનો દેવ પ્રભુ સ્તુતિવાન થાઓ, કેમકે તેણે પોતાના લોકની મુલકાત લઈને તેઓનો ઉદ્ધાર કીધો છે.

⁶⁹ અને તેણે જગતના આરંભથી તથા આવેલા પવિત્ર ભવિષ્યવાદીઓના મ્હોથી કહ્યું હતું તે પ્રમાણે,

⁷⁰ તેણે પોતાના સેવક દાઉદના કુળમાં આપણને સારું તારણનું શીંગ ઉભું કીધું છે,

⁷¹ એટલે આપણા શત્રુઓથી તથા આપણા પર દ્વેષ રાખનારા સર્વના હાથમાંથી તારણ;

⁷² એ સારૂ કે તે આપણા બાપદાદાઓ પ્રત્યે દયા દેખાડે, તથા પોતાનો પવિત્ર કરાર સંભારે,

⁷³ એટલે તેણે આપણા બાપ ઈબ્રાહિમની સાથે જે સમ ખાધા તે;

⁷⁴ એ માટે કે તે આપણે સારૂ એવું કરે કે, આપણે પોતાના શત્રુઓના હાથમાંથી છુટકો પામીને, નિર્ભયતાથી આપણા આખા આયુષ્યભર તેની આગળ

⁷⁵ શુદ્ધતાથી તથા ન્યાયીપણાથી તેની સેવા કરીએ.

⁷⁶ અને, ઓ છોકરા, તું પરાત્પરનો ભવિષ્યવાદી કહેવાશે; કેમકે તું પ્રભુની આગળ ચાલશે, એ માટે કે તું પ્રભુના માર્ગો તૈયાર કરે,

⁷⁷ તથા તેના લોકના પાપની માફી મળવાથી જે તારણ તેનું જ્ઞાન તું તેઓને આપે.

⁷⁸ [અને આ માફી] આપણા દેવની ઘણી દયાને લીધે થાય છે; જેણે કરીને અરૂણોદય ઉપરથી આપણા પર આવ્યો છે,

⁷⁹ એ માટે કે અંધારામાં તથા મરણથી છાયામાં જેઓ બેઠેલા તેઓને તે પ્રકાશ પમાડે તથા આપણા પગને શાંતિના માર્ગમાં દોરી જાય.

⁸⁰ અને છોકરો મોટો થયો, ને આત્મામાં બળવાન થતો ગયો, અને ઇસ્રાએલમાં તેના પ્રગટ થવાના દિવસ સુધી તે રાનમાં રહ્યો.