¹ અને ઇકોનીમાં એમ થયું કે તેઓ યહુદીઓના સભાસ્થાનમાં સાથે ગયા, ને એવી રીતે બોલ્યા કે ઘણાજ યહુદીઓએ તથા હેલેનીઓએ વિશ્વાસ કીધો.

² પણ અવિશ્વાસી યહુદીઓએ વિદેશીઓને ઉશ્કેરીને તેઓનાં મનમાં ભાઈઓને સામે અંટસ ઉપજાવ્યો.

³ તે માટે તેઓ લાંબી મુદ્દત સુધી ત્યાં રહીને પ્રભુના આશરાથી હિમ્મત રાખીને બોલતા રહ્યા, ને પ્રભુએ તેઓની હસ્તક ચમત્કારો તથા આશ્ચર્ય કૃત્યો થવા દઈને પોતાની કૃપાની વાતના ટેકામાં સાક્ષી આપી.

⁴ પણ શહેરના લોકોમાં ફૂટ પડી, ને કેટલાકે યહુદીઓનો પક્ષ લીધો, ને કેટલાકે પ્રેરિતોનો પક્ષ લીધો.

⁵ અને તેઓનું અપમાન કરવા તથા તેઓને પત્થરે મારવા સારૂ જયારે વિદેશીઓએ તથા યહુદીઓએ પોતાના અધિકારીઓ સુદ્ધાં હલ્લો કીધો,

⁶ ત્યારે તેઓ તે જાણીને લુકનીનાં શહેરો લુસ્ત્રા તથા દેર્બેમાં, તથા આસપાસના પ્રાંતોમાં નાસી ગયા;

⁷ ને ત્યાં તેઓએ સુવાર્તા પ્રગટ કીધી.

⁸ અને લુસ્રામાં એક પાંગળો માણસ બેઠેલો હતો, ને પોતાની માના પેટથી લંગડો હતો, ને કદી ચાલ્યો ન હતો.

⁹ તેણે પાઉલને બોલતો સાંભળ્યો, અને [પાઉલે] તેની તરફ એકી નજરે જોઈ રહીને, તથા તેને સાજો થવાનો વિશ્વાસ છે,

¹⁰ એ જાણીને મોટે ઘાટે કહ્યું કે, તું પોતાને પગે સીધો ઉભો રહે. ત્યારે તે કુદીને ઉભો થયો, ને ચાલવા લાગ્યો.

¹¹ અને પાઉલે જે કીધું હતું તે જોઇને લોકોએ લુકાનીની ભાષામાં મોટે ઘાટે કહ્યું કે, માણસોનું રૂપ ધરીને દેવો આપણી પાસે ઉતરી આવ્યા છે.

¹² અને તેઓએ બર્નાબાસને ઝૂસ કહ્યો, ને પાઉલને હેર્મસ કહ્યા, કેમકે તે મુખ્ય બોલનાર હતો.

¹³ અને ઝૂસ [નું મંદિર] એ શહેરને મોખરે હતું તેનો યાજક ગોધાઓ તથા ફૂલના હાર ભાગળે લાવીને લોકો સુદ્ધાં બલિદાન ચઢાવવા ઈચ્છતો હતો.

¹⁴ પણ બર્નાબાસ તથા પાઉલ પ્રેરિતોએ તે વિષે સાંભળ્યું ત્યારે તેઓએ પોતાનાં લૂગડાં ફાડ્યાં, ને લોકોમાં દોડીને મોટે ઘાટે કહ્યું કે,

¹⁵ ગૃહસ્થો, તમે એ કામ કેમ કરો છો? અમે પણ તમારા જેવા વિકારી માણસ છીએ, ને આ મિથ્યા વાતો તજી દઈને આકાશ, તથા પૃથ્વી, તથા સમુદ્ર, તથા તેઓમાંના સઘળાનો ઉત્પન્નકર્તા, કે જે જીવતો દેવ છે તેની ભણી તમે ફરો, માટે અમે તમને સુવાર્તા પ્રગટ કરીએ છીએ.

¹⁶ તેણે તો આગલા જમાનાઓમાં સર્વ લોકોને પોતપોતાને માર્ગે ચાલવા દીધા;

¹⁷ તો પણ ભલું કરીને, અને આકાશથી વરસાદ તથા ફળવંત ઋતુઓ તમને આપીને, અને અન્નથી તથા આનંદથી તમારાં મન તૃપ્ત કરીને તે પોતા વિષે સાક્ષી આપ્યા વગર રહ્યા નથી.

¹⁸ અને તેઓએ એ વાતો કહીને લોકોને તેમની પ્રત્યે બલિદાન ચઢાવતાં મુશ્કેલીથી અટકાવ્યા.

¹⁹ પણ અંત્યોખ તથા ઇકોનીથી કેટલાક યહુદીઓ ત્યાં આવ્યા, ને તેઓએ લોકોને સમજાવીને પાઉલને પત્થરે માર્યો, ને તે મરી ગયો છે એવું ધારીને તેને શહેર બહાર ઘસડી નાખ્યો.

²⁰ પણ તેની આસપાસ શિષ્યો ઉભા હતા તેવામાં તે ઉઠીને શહેરમાં આવ્યો, ને બીજે દિવસે, બર્નાબાસ સાથે દર્બે ગયો.

²¹ અને તે શહેરમાં સુવાર્તા પ્રગટ કર્યા પછી, તથા ઘણા શિષ્યો મેળવ્યા પછી તેઓ લુસ્રા તથા ઇકોની તથા અંત્યોખમાં પાછા આવ્યા,

²² ને શિષ્યોના મન સ્થિર કરતાં તેઓએ તેઓને વિશ્વાસમાં ટકી રહેવાને સુબોધ કીધો, ને [કહું કે,] આપણને ઘણાં સંકટમાં થઈને દેવના રાજ્યમાં જવું પડે છે.

²³ અને તેઓએ હરેક મંડળીમાં તેઓને સારૂ વડીલો ઠરાવીને ઉપવાસ સહિત પ્રાર્થના કરીને તેમને પ્રભુ, કે જેના પર તેઓએ વિશ્વાસ કર્યો હતો તેને સોંપ્યો.

²⁴ પછી તેઓ પીસીદીઆમાં થઈને પામ્ફૂલ્યા આવ્યા.

²⁵ અને પેર્ગામાં વાત કર્યા પછી તેઓ આતાલીએ આવ્યા.

²⁶ પછી ત્યાંથી તેઓ વહાણમાં બેસીને અંત્યોખ ગયા, કે જ્યાં તેઓ જે કામ પૂરું કરી આવ્યા તેને સારૂ દેવની કૃપાને સોંપાયા હતા.

²⁷ અને તેઓએ ત્યાં આવીને મંડળીને એકઠી કરીને જે જે કામ દેવે તેઓની હસ્તક કર્યા હતા તે, ને શી રીતે તેણે વિદેશીઓને સારૂ વિશ્વાસનું બારણું ઉધાડ્યું હતું તે બધું કહી બતાવ્યું.

²⁸ અને શિષ્યોની સાથે તેઓ ત્યાં ઘણા દિવસ રહ્યા.