¹ અને એમ થયું કે ઘણા લોક તેના પર પડાપડી કરીને દેવની વાત સાંભળતા હતા, ત્યારે તે ગેન્નેસારેતના સરોવરને કાંઠે ઉભો રહ્યો હતો.

² અને તેણે સરોવરને કાંઠે લાગેલી બે હોડી દીઠી, પણ માછીઓ તેઓ પરથી ઉતરીને જાળો ધોતા હતા.

³ તે હોડીઓમાંની એક સીમોનની હતી, તે પર તે ચઢયો, ને તેને કાંઠાથી થોડે દૂર હંકારવાનું કહ્યું. અને તેણે બેસીને લોકોને હોડી પરથી બોધ કીધો.

⁴ અને બોલી રહ્યા પછી તેણે સિમોનને કહ્યું કે, ઉંડા પાણીમાં હંકારો, ને [માછલાં] પકડવા સારૂ તમારી જાળો નાખો.

⁵ અને સીમોને ઉત્તર આપતા કહ્યું કે, સાહેબ, અમે આખી રાત મહેનત કીધી, પણ કશું પકડ્યું નહિ, તોપણ તારો કહ્યાથી હું જાળો નાખીશ.

⁶ અને એમ કીધા પછી તેઓએ માછલાંનો મોટો જથો ઘેરી લીધો, ને તેઓની જાળ ફાટવા લાગી.

⁷ અને તેઓનાં ભાગિયા બીજી હોડીમાં હતા તેઓને તેઓ ઇસારો કીધો કે, તેઓ આવીને તેઓને સહાય કરે; અને તેઓએ આવીને બન્ને હોડીઓ એવી ભરી કે તેઓ ડૂબવા લાગી.

⁸ અને તે જોઇને સીમોન પીતરે ઈસુના પગ આગળ પડીને કહ્યું કે, ઓ પ્રભુ, મારી પાસેથી જા, કેમકે હું પાપી માણસ છું.

⁹ કેમકે તે તથા તેના સઘળા સાથીઓ માછલાંનો જે જથો પકડ્યો હતો, તેથી અચરતી પામ્યા.

¹⁰ અને ઝબદીના દીકરા, યાકુબ તથા યોહાન, જે સીમોનના ભાગ્યા હતા, તેઓને પણ અચંબો લાગ્યો. અને ઈસુએ સીમોનને કહ્યું કે, બી મા, હવેથી તું માણસો પકડનાર થશે.

¹¹ અને તેઓની હોડીઓને કાંઠે લાવ્યા પછી તેઓ બધું મુકીને તેની પાછળ ચાલ્યા.

¹² અને એમ થયું કે તે એક શહેરમાં હતો, ત્યારે જુઓ, એક કોઢે ભરેલો માણસ હતો; ને તે ઈસુને જોઇને તેને પગે પડ્યો; ને તેને વિનંતી કરતા બોલ્યો, પ્રભુ, જો તું ચાહો તો તું મને શુદ્ધ કરી શકે છે.

¹³ અને તેણે હાથ લાંબો કર્યો, ને તેને અડકીને કહ્યું કે, હું ચાહું છું, તું શુદ્ધ થા. અને તરત તેનો કોઢ જતો રહ્યો.

¹⁴ અને તેણે તેને તાકીદ કીધી કે કોઈને કહેવું નહિ, પણ મુસાના ફરમાવ્યા પ્રમાણે જઈને યાજકને પોતાને દેખાડ, ને તારા શુદ્ધિકરણને લીધે, તેઓને માટે સાક્ષી તરીકે, અર્પણ ચઢાવ.

¹⁵ પણ તેના સંબંધીને ચરચા ઉલટી વધારે ફેલાઈ, ને અતિઘણા લોક સાંભળવા સારૂ તથા પોતાના મંદવાડથી સજા થવા સારૂ તેની પાસે એકઠા થયા.

¹⁶ પણ પોતે એકાંતે રાનમાં જઈને પ્રાર્થના કીધી.

¹⁷ અને એમ થયું કે એક દહાડો તે બોધ કરતો હતો, ત્યારે ફરોશીઓ તથા નિયમોપદેશકો ગાલીલના હરેક ગામમાંથી તથા યહુદાહથી તથા યરૂશાલેમથી આવીને ત્યાં બેઠા હતા, ને [મંદાને] સાજા કરવા સારૂ પ્રભુનું પરાક્રમ તેની પાસે હતું.

¹⁸ અને જુઓ, કેટલાએક જણ એક પક્ષઘાતી માણસને ખાટલા પર લાવ્યા, ને તેને માંહે લઇ જઈને તેની આગળ મુકવાનો તેઓએ પ્રયત્ન કીધો;

¹⁹ પણ તેને માંહે લઇ જવાનો લાગ ભીડને લીધે ન ફાવ્યાથી તેઓએ ધાબા પર ચઢીને છાપરામાં થઈને તેને ખાટલા સુદ્ધાં ઇસુની આગળ વચ્ચે ઉતાર્યો.

²⁰ ને તેણે તેઓનો વિશ્વાસ જોઇને તેને કહ્યું કે, માણસ, તારાં પાપ તને માફ થયાં છે.

²¹ અને શાસ્ત્રીઓ તથા ફરોશીઓ માહોમાંહે વિચાર કરીને કહેવા લાગ્યા કે, આ દુર્ભાષણ કરનાર કોણ છે? એકલા દેવ શિવાય બીજો કોણ પાપની માફી આપી શકે છે?

²² પણ ઇસુએ તેઓના વિચાર જાણીને તેઓને ઉત્તર આપતા કહ્યું કે, તમે પોતાના મનમાં શા વિચાર કરો છો?

²³ આ બેમાનું વધારે સહેલું કયું છે, તારાં પાપ તને માફ થયાં છે, એમ કહેવું, અથવા ઉઠીને ચાલ, એમ કહેવું?

²⁴ પણ પૃથ્વી પર માણસના દીકરાને પાપ માફ કરવાનો અધિકાર છે, એ તમે જાણો માટે, (તેણે પક્ષઘાતીને કહ્યું કે) હું તને કહું છું કે ઉઠ, તારો ખાટલો ઉચકીને તારે ઘેર ચાલ્યો જા.

²⁵ અને તરત તે તેઓની આગળ ઉઠીને જે પર તે સૂતો હતો તે ઉંચકીને દેવની સ્તુતિ કરતો પોતાને ઘેર ગયો.

²⁶ અને સઘળા વિસ્મિત થયા, ને તેઓએ દેવની સ્તુતિ કીધી; ને તેઓએ ભયભીત થઈને કહ્યું કે, આજ અપને અજાયબ જેવી વાતો જોઈ છે.

²⁷ ત્યાર પછી તે નીકળ્યો ને લેવી નામે એક દાણી દાણની ચોકી પર બેઠેલો હતો તેને જોઇને તેણે કહ્યું કે, મારી પાછળ ચાલ.

²⁸ અને તે સઘળું મુકીને ઉઠ્યો, ને તેની પાછળ ગયો.

²⁹ અને લેવીએ પોતાને ઘેર તને સારૂ મોટી મિજબાની કીધી, ને દાણીઓ તથા બીજાઓનો મોટો જથો તેઓની સાથે જમવા બેઠો હતો.

³⁰ અને ફરોશીઓએ તથા તેઓના શાસ્ત્રીઓએ તેના શિષ્યોની સામે કચકચ કરીને કહ્યું કે, તમે દાણીઓ તથા પાપીઓની સાથે કેમ ખાઓ પીઓ છો?

³¹ ને ઈસુએ તેઓને ઉત્તર આપતાં કહ્યું કે, જેઓ સાજા છે તેઓને વૈદની અગત્ય નથી, પણ જેઓ માંદા છે તેઓને છે;

³² ન્યાયીઓને નહિ, પણ પાપીઓને પસ્તાવાને સારૂ બોલાવવા હું આવ્યો છું.

³³ અને તેઓએ તેને કહ્યું કે, યોહાનના શિષ્યો અને તેમજ ફરોશીઓના શિષ્યો પણ વારંવાર ઉપવાસ તથા પ્રાર્થના કરે છે, પણ તારા શિષ્યો ખાય પીએ છે.

³⁴ અને ઈસુએ તેઓને કહ્યું કે, વાર જાનૈયાઓની સાથે છે ત્યાં સુધી તેઓની પાસે તમે ઉપવાસ કરાવી શકો છો શું?

³⁵ પણ એવા દહાડા આવશે; અને વાર તેઓની પાસેથી લઇ લેવાશે, ત્યારે તે દહાડાઓમાં તેઓ ઉપવાસ કરશે.

³⁶ અને તેણે તેઓને એક દ્રષ્ટાંત પણ કહ્યું કે, નવા લૂગડામાંથી કટકો ફાડીને કોઈ માણસ જુના લુગડાને થિગડું દેતું નથી; જો દે તો તે નવું ફાડશે, ને વળી નવામાંથી લીધેલું થિગડું જુનાને મળતું નહિ આવશે.

³⁷ અને નવો દ્રાક્ષરસ જુની મસકોમાં કોઈ ભરતું નથી, જો ભરે તો નવો દ્રાક્ષરસ મસકોને ફાડી નાખશે, અને પોતે ઢળી જશે ને મસકોને નાશ થશે.

³⁸ પણ નવો દ્રાક્ષરસ નવો મસકોમાં ભરવો જોઈએ.

³⁹ અને જુનો દ્રાક્ષરસ પીધા પછી કોઈ નવાને ચહાતો નથી, કેમકે તે કહે છે કે. જુનો સારો છે.