¹ અને તે દિવસોમાં શિષ્યોની સંખ્યા વધતી જતી હતી, ત્યારે હેબ્રીઓની સામે હેલેની યહુદીઓએ કચકચ કીધી, કેમકે નિત્યની વહેચણીમાં તેઓની વિધવાઓને પડતી મુકવામાં આવતી હતી.

² ત્યારે બાર [પ્રેરીતોએ] બધા શિષ્યોને પોતાની પાસે બોલાવીને કહ્યું કે, અમે દેવની વાત મુકીને ભાણા પિરસવાની સેવા કરીએ, એ શોભતું નથી.

³ માટે, ભાઈઓ, તમે પોતામાંથી [પવિત્ર] આત્માએ તથા જ્ઞાને ભરપૂર એવા સાત સુકીર્તિમાન માણસને શોધી કાઢો, કે જેઓને અમે એ કામ પર ઠરાવીએ.

⁴ પણ અમે તો પ્રાર્થનામાં તથા [દેવની] વાતની સેવામાં લાગુ રહીશું.

⁵ અને એ વાત આખા સમુદાયને સારૂ લાગી; ને સ્તેફન નામે વિશ્વાસે તથા પવિત્ર આત્માએ ભરપુર એવા એક માણસને, તથા ફીલીપને, તથા પ્રોખરસને, તથા નિકાનોરને, તથા તીમોનને, તથા પાર્મેનાસને, તથા અંત્યોખના થએલા યહુદી નિકોલાસને, તેઓએ પસંદ કર્યા.

⁶ અને તેઓએ તેમને પ્રેરિતોની આગળ ઉભા કર્યા, અને એઓએ પ્રાર્થના કરીને તેમના પર હાથ મુક્યા.

⁷ અને દેવની વાત ફેલાઈ ગઈ, ને યરુશાલેમમાં શિષ્યોની સંખ્યા ઘણી વધી ગઈ; અને યાજકોનો મોટો જથો વિશ્વાસને આધીન થયો.

⁸ અને સ્તેફને કૃપાથી તથા સામર્થ્યથી ભરપૂર હોઈને મોટો અદ્ભુત કામો તથા ચમત્કારો લોકોમાં કર્યાં.

⁹ પણ લીબેરતીની કહેવાએલી સભામાંના, તથા કુરેનીના, તથા આલેક્સાંદ્રિયાના, તથા કિલકીમાંના તથા આશીઆમાંના કેટલાએક ઉભા થઈને સ્તેફન સાથે વાદવિવાદ કરવા લાગ્યા.

¹⁰ પણ તે એવા જ્ઞાનથી તથા આત્માની પ્રેરણાથી બોલતો હતો કે તેઓ તેની સામા ટકી શક્યા નહિ.

¹¹ ત્યારે તેઓએ કેટલાએક માણસોને સમજાવ્યા, ને તેઓએ કહ્યું કે, અમે તેને મુસા તથા દેવને ઉલટું દુર્ભાષણ કરતો સાંભળ્યો છે.

¹² અને તેઓ લોકોને તથા વડીલોને તથા શાસ્ત્રીઓને ઉશ્કેરીને તેના પર તુટી પડ્યા, અને તેને પકડીને સભામાં લાવ્યા.

¹³ અને તેઓએ જુઠા સાક્ષીઓ ઉભા કીધા જેઓએ કહ્યું કે, એ માણસ આ પવિત્ર જગ્યા તથા નિયમશાસ્ત્રને ઉલટું દુર્ભાષણ કર્યા વિના રહેતો નથી;

¹⁴ કેમકે અમે તેને એમ કહેતો સાંભળ્યો છે કે, એ ઇસુ નાઝારી આ જગ્યાને નાશ કરશે, જે રીતીઓ મુસાએ આપણે સોંપી છે તેઓને એ બદલશે.

¹⁵ અને જેઓ સભામાં બેઠા હતા તે સઘળાએ તેની તરફ એકી નજરે જોઈ રહેતાં તેનું મ્હો દૂતના મ્હો જેવું જોયું.